Daka akuzon: Keqpërdorimi i Fondeve, krimi i shekullit

0
1213

Prishtinë, 14 janar 2013 – Musa Daka këkron nga autoritetet kosovare dhe të EULEX-it, zbardhjen e keqpërdorimit të të gjitha Fondeve financiare që janë mbledhur për luftën në Kosovë. Në një intervistë ekskluzive për Kosova Info, Daka po ashtu, kërkon që të gjithë ata që keqpërdorën fondet të përfundojnë prapa grilave. Në këtë intervistë Daka bënë të ditur se për vrasjen e Ahmet Krasniqit duhet të kërkohet llogari nga Bujar Bukoshi, Xhavit Haliti e Isa Mustafa. Sipas tij, statusin special për veriun e Kosovës po e negociojnë dy shtete mike të vendit, Turqia dhe Anglia. Refuzimi i këtij negocimi i ka kushtuar Fatmir Sejdiut me largimin nga posti i Presidentit. Ai thotë se në bazë të dëshmive të Xhavit Halitit, janë dënuar Jakup Krasniqi, Hydajet Hyseni e të tjerët.

Kosova Info: Cila ka qenë dhe është veprimtaria juaj në Lidhjen Demokratike të Kosovës?

Musa Daka: Që nga viti 1990, faktikisht me 1 korrik kur është formuar Dega e parë në ShBA, jam zgjedh me votën e anëtarësisë, kryetar Dege, dhe që nga viti 1991 e deri më tani kam qenë dhe jam anëtarë i LDK-së, pra që nga themelimi e deri në largimin tim në vitin e kaluar kam qenë anëtarë i Këshillit të Përgjithshëm të LDK-së. Nga zgjedhjet e vitit 1990 e deri më tani kam qenë kryetar dege, nënkryetar arkëtar, në Kryesi e mandej edhe në lidershipin e LDK-së për ShBA dhe Kanada. Njëkohësisht, kam qenë edhe përfaqësues i ShBA dhe i Kanadasë në Këshillin Koordinues me seli në Shtutgard në Gjermani ku kam përfaqësuar Degën më se 20 vite.

Kosova Info: Pse u shkarkuat nga Këshilli i Përgjithshëm i LDK-së?

Musa Daka: Nga ky Këshill jam shkarkuar për shkak se në prezencën e Isa Mustafës dhe të Fatmir Sejdiut kam kërkuar nga Ismet Beqiri që të kërkohet nga Grupi Parlamentar i LDK-së në Kuvend, llogari nga ish-qeveria në ekzil e Bujar Bukoshit, që të zbardhen jo vetëm vrasjet politike që kanë ndodhur, por edhe të jepet llogari institucioneve të Kosovës jo me fjalë, por me fakte. Po ashtu kam kërkuar që Isa Mustafa, ish-ministër i Financave në ekzil, të jap llogari paraprake me procedurat ligjore, në ministrinë e Financave të tashme të Qeverisë së Kosovës, për Fondin e 3%.  Një e gjë e tillë nuk ka ndodhur asnjëherë deri më tash. Pra janë sjellë si kapadai më një fond si të tyre privat, ku edhe sot vazhdojë ta keqpërdorin. Pas shkuarjes sime në ShBA, Mustafa, kryetar i LDK-së, e ka thirr një seancë të Këshillit të Përgjithshëm të LDK-së, ku nuk ka kërkuar shkarkimin tim, por me një dinakëri, ka thënë se disa njerëz që nuk i kemi aktiv në Këshill, duhet t’i zëvendësojmë me emra të rinj, dhe ajo ka ndodh, ku Këshilli pa i ditur emrat ia ka lënë duart e lira Mustafës dhe na kanë zëvendësuar diku 4-5 vetave nga Këshilli me emra të cilët atij i ka konvenuar dhe neve na kanë larguar.

Kosova Info: Cila ka qenë pozita e juaj në Fondin e 3% në ShBA dhe Kanada?

Musa Daka: Unë nuk kam qenë në Kryesinë e 3%, në asnjë moment, por meqë kam qenë Kryetar Dege dhe dihet që aktiviteti apo grumbullimi i mjeteve kryesisht ka qenë nga LDK-ja, si në ShBA, e po ashtu edhe në Evropë, Kanada, Australi, Zelandë të Re etj, unë kam qenë njëri prej atyre, i cili moralisht dhe politikisht e kemi përkrahë dhe i kemi grumbulluar mjetet për atë fond. Pra anëtarësia jonë ka qenë flamurtare më grumbullimin e mjeteve në ShBA.

Kosova Info: Pra ju keni qenë njëri ndër protagonistët e grumbullimit të këtyre mjeteve?

Musa Daka:
Po patjetër. Mund të ceki rastin kur prof. Ali Aliu si përfaqësues i Kosovës në Tiranë, më drejtohet me shkresë kur shkon grupi i parë, sepse atëherë ishte themeluar celula e parë e UÇK-së, po ashtu nga LDK-ja, dhe Aliu në atë kohë pranoi 100 ushtarët e parë që të stërvitën në Shqipëri, ku më kërkon ndihmë materiale në ShBA, dhe unë së bashku me shokët tanë e bëmë një fushatë dhe e dërguam Daut Dautin, i cili ka qenë anëtar i Kryesisë që nga themelimi, dhe ka shkuar në Shqipëri për të dërguar mjetet për ushtrinë tonë, pra në vitin 1991. D.m.th kemi qenë udhëheqës në një formë, dhe bashkëpunëtorët të cilët së bashku kemi qenë në Kryesi, i kemi emëruar si arkëtar të udhëheqjes së 3%. Këtu duhet të ndahet llogaria e 3% dhe e fondeve tona që I kishin si LDK.

Kosova Info: Z. Daka, ju akuzoni z. Bujar Bukoshin dhe Isa Mustafën për keqpërdorim të Fondit të 3%, dhe deklaroni se është vjedhë ku fond dhe është vjedhë arka e shtetit që është grumbulluar në atë kohë? Keni fakte dhe dëshmi për një akuzë të tillë?

Musa Daka: Kjo nuk është një akuzë, por janë fakte. Ne i kemi krijuar mjetet dhe Bujar Bukoshin e kemi nxjerrë jashtë në ekzil si qeveri e përkohshme, pra si qeveri në ekzil ku ai i ka formuar organet. Dihet se aty kanë qenë Nik Gjeloshi, Ramush Tahiri nënkryetar e të tij, të cilët më *as i ka larguar vet, dhe unë nuk mund të akuzoj dikë tjetër përveç Bukoshit dhe Mustafës, ku ky i fundit ka qenë ministër i Financave. Unë nuk mund të kërkojë llogari nga një anëtar i thjeshtë i asaj qeverie, por duhet të kërkoj llogari, pikërisht tek kreu. Këtu është problemi, LDK-ja tani në Prishtinë, mundohet ta implikojë partinë e stome me hajnitë e atëhershme, ku këto janë dy gjëra të kundërta. Për kërkesën e llogarisë së 3%, bazohem në fakte. Unë faktet i kam deponuar, i ka edhe partia e LDK-së, EULEX-i, Prokuroria e Kosovës, i kanë mjetet e informimit, pra ato janë publike. Nëse z. Bukoshi ishte në gjendje të gënjejë së bashku me z. Mustafën deri në vitin e kaluar kur thanë se nuk ekziston më ky Fond, dhe pas publikimit të fakteve bankare që njerëzit e mi apo unë i kemi nxjerrë nga Banka e Biznesit në Kosovë, dhe po ashtu edhe nga Banka Gjermane, dhe në pamundësi që t’i mohojnë ato, atëherë ata të dy e pranojnë se Fondi ekziston. Po ashtu, ata e pranojnë se Naser Osmani është i autorizuar t’i tërheqë mjetet, deputet i sotëm në Kuvendin e Kosovës. D.m.th janë fakte që nuk mund të mohohen.

Kosova Info: Sa mendoni se ka qenë shuma e Fondit?

Musa Daka:
Sasia për të cilën flasim, unë në bazë të dhënave që i kam në terren si në Gjermani, e po ashtu edhe në Zvicër edhe në vendet tjera, së bashku kur të bashkohen edhe fondi i Ahenit, Fondi i 3%, huaja popullore e ashtuquajtur, Fondi i Drenicës dhe Fondet tjera, që kanë qenë të menaxhuara nga Bujar Bukoshi dhe Isa Mustafa, del një shifër diku rreth 1 miliard  të sotme euro, apo 2.2 miliardë marka gjermane. Ai do të jetë krimi i shekullit ndoshta, dhe do të shënohet në librin e Ginisit për hajni. Dhe sot pikërisht këta persona, që në atë kohë jo vetëm që e dorëzuan UÇK-në-LPK-së, apo unë siç i quaj disa rrugaçëve të Evropës, mandej formuan FARK-un që të del si kundërshtare e UÇK-së, ku në vend që të luftohet kundër serbëve, ata luftonin njëri me tjetrin. Na i kanë vrarë njerëzit më të mirë. Dhe për t’i ikur kësaj përgjegjësie, z. Bukoshi bënë një partnership me Xhavit Halitin, ku bëhet nënkryetar i asaj qeverie ne ekzil, që në atë kohë luftonte, të asaj qeverie në atë kohë ku gjuheshin me shpuzore në Rambuje në prezencën e amerikanëve dhe të miqve tanë, fizikisht konfrontoheshin, ndërsa sot dalin dhe më bëjnë një akuzë mua se gjoja unë qenkam me ShIK-un apo me PDK-në. Ata janë kriminelët e njëjtë, kur një ditë kanë luftuar kundër njëri tjetrit, kurse sot janë bashkë. Kjo është e pakuptimtë. Me një fjalë një njeri që gjysmën e jetës ia ka dedikuar LDK-së, ku jam themelues dhe ku kam pasur takime me zyrtarë gjerë në instancat më të larta duke përfshirë presidentin amerikan, që zyrtarisht jam takuar me të gjatë luftës në Kosovë, sot mundohen një Haki Rugovë, nënkryetarë i tanishëm I LDK-në, ku më së paku i takon atij të flas si emër Rugova, jo si mbiemër dhe jo figurë politike, i cili i shërben interesave të ngushta personale, sikurse edhe shumë të tjerë Bukoshit dhe Mustafës, për ta mbuluar krimin e organizuar që nuk mundet të gjendet ndonjë emërtim tjetër, vetëm përpos asaj që janë në shërbim të mafisë së organizuar, e që unë i quaj kriminel ordinerë.

Kosova Info: Ju po thoni që emrat e zyrtarëve që i përmendet më lartë janë keqpërdorues të këtyre mjeteve?

Musa Daka: Në këtë grup të këtyre njerëzve, nuk mund ta dallosh as Xhavit Halitin e as Bujar Bukoshin e Isa Mustafën, kur në atë kohë kanë bërë një krim politik dhe ekonomik. Kështu e kam thënë çdo herë dhe po e them prapë. Kjo nuk ka të bëjë asgjë me partinë e LDK-së, dhe me degën e ShBA-së të cilën ne e kemi themeluar ku edhe sot jam aktivë në këtë Degën e New Yorkut ku jam anëtar i Kryesisë, dhe të mundohet tani që konfliktin e tij personal apo duke i mbuluar hajnitë e veta, mundohet të më nxjerrë mua kinse që unë paskam qenë kundër LDK-së, është shumë absurde.

Kosova Info: Z. Daka, presidenti Rugova në atë kohë ka qenë pro FARK-ut?

Musa Daka: Lidhja Demokratike e Kosovës në marrëveshje me Fehmi Aganin, gjegjësisht me presidentin Rugova në atë kohë, edhe pse ai nuk ka dashtë të jetë në krahun e luftës, sepse ishte pacifist, ia ka lënë duart e lira qeverisë në ekzil, dhe kur ne e kemi themeluar UÇK-në. Në këtë rast nuk po them unë, por anëtarët e LDK-së, njerëzit si Sali Çeku, Zahir Pajaziti, Hamëz Jashari dhe të tjerë, dhe ky është një fakt që nuk mund të mohohet. Bujar Bukoshi pas marrëveshjes së Oslos, ku është nënshkruar se së bashku me Ahmet Krasniqin e ndjerë dhe në anën tjetër me Adem Demaçin dhe Xhavit Halitin nga krahu i ashtuquajtur politik i UÇK-së, sepse ishte konflikti që kush ta merr komandën, e bënë marrëveshjen e Oslos, dhe Fatmir Zymberi i kalon mjetet e LDK-së dhe të Fondit tek Xhavit Haliti në Oslo, e po ashtu kalon në atë krah dhe më vonë normalisht që e vrasin Ahmet Krasniqin, ku deri vonë asnjëherë nuk kanë kërkuar zbardhjen e vrasjes. Tash pas sa e sa vitesh Mustafa, kërkon që të zbardhet rasti i vrasjes së Ahmet Krasniqit, kur e dinë mirë se kush e ka ekzekutuar atë. Ai ka qenë bashkë-ministër me të në të njëjtën qeveri. Nuk e dinë Bukoshi apo qeveria e Shqipërisë se kush e ka ekzekutuar, kur Krasniqi është çarmatos dhe është ekzekutuar në shkallët e tij në hyrje të banesës, është absurde kjo. Dhe tani shtrohet pyetja, apo përgjigja ime do të ishte kjo, si ka mundësi që sot Xhavit Haliti dhe Bujar Bukoshi të jenë në të njëjtin parlament, apo t’i shërbejnë të njëjtës qeveri, kur më herët kanë qenë kundërshtar, apo më shumë e kanë luftuar njëri tjetrin sesa vet Serbinë, okupatorin, pra përgjigja del prej kësaj. Fondi “Vendlindja Thërret” është bashkuar, krimi i asaj ane, me këta kriminelët e Fondit të 3%, dhe tash janë partner, pra në një qeveri mafioze.

Kosova Info: Sipas jush kush e ka organizuar dhe kush e ka vrarë z. Ahmet Krasniqin?

Musa Daka: Për këtë më së miri është të pyeten Bujar Bukoshi dhe Xhavit Haliti, sepse njëri ka qenë shef i Shtabit apo i Logjistikës në atë rast Xhavit Haliti, dhe në anën tjetër ka qenë ministri i Mbrojtjes Ahmet Krasniqi, apo duhet të jap llogari dhe Bujar Bukoshi, sepse ka qenë kryeministër dhe ishte bashkëpunëtori më i ngushtë i tij, por edhe Isa Mustafa. Njerëzit i dinë emrat e dorasëve, dhe ata edhe sot jetojnë të lirë. Të gjithë si Bukoshi, Mustafa e Haliti i dinë emrat se kush e ka vra Ahmet Krasniqin. Në atë kohë Xhavit Haliti ka qenë në Rogner, kur Ahmet Krasniqi është ekzekutuar në Tiranë. Ishte qeveria e përkohshme e Rognerit, apo përfaqësia e tyre në hotelin Rogner. Këta duhet ta japin përgjigjen, apo duhet të kërkojnë nga qeveria shqiptare nga vet kryeministri i tanishëm Sali Berisha, i cili i ikë çdo herë kësaj çështjeje dhe asnjëherë nuk është marr me këtë rast dhe shtrohet pyetja pse. Pse u dogj Shqipëria në vitit 1997, të ashtuquajtura revolucionet e vonuara të Qosjes, dhe pse asnjëherë nuk u zbardhë rasti i Ilir Konushevcit e të tjerëve.

Kosova Info: Z. Daka, Isa Mustafa, është kryetar i LDK-së dhe i një partie opozitare?

Musa Daka: Isa Mustafa pretendon se është kryetar i një partie opozitare, por unë nuk mendoj ashtu. Unë mendoj se është një partner i fortë i Thaçit, ku përmes tij është formuar “Lista Rugova”, dihen emrat se kush ka qenë themelues në krye me Bukoshin, me Atdhe Gashin,  Astrit Haraqinë etj, dhe sot ku janë ata njerëz?, qytetarët e Kosovës e dinë më mirë se unë.

Kosova Info: Ju po deklaroni se Fondi i 3% ende ekziston. Ku bazoheni?

Musa Daka: Unë po ju them se ky fond ende ekziston, sepse ende tërhiqen mjetet.

Kosova Info: Kur keni filluar të interesoni për herë të parë për zbardhjen e Fondit e 3%?

Musa Daka: Për herë të parë kam kërkuar në vitin 2001-2002, kur i kam bërë kërkesë presidentin Ibrahim Rugova dhe Kryesisë së asaj kohe, e po ashtu edhe nga deputetët tanë. Në disa numra të mjeteve e informimit i kanë publikuar ato, madje edhe akuzat e pabaza të ashtuquajturit të Xhavit Haliti, Bujar Bukoshit, dhe të tjerëve, ku më akuzojnë mua që kam kinse pretendime. Unë nuk kam pretendime, Asnjëherë nuk kam ardhur në Kosovë që të marrë ndonjë post, ndonjë vend pune, apo biznes dhe as që pretendoi. Por, këta kanë gabuar në kalkulimin e tyre, që është vetëm një storie e ditës, duke mos llogaritur se ne jemi të vendosur. Para një muaj e gjysmë është hapur procedurë ligjore për bankën Dardania, të cilën e kemi blerë me Fondin e Republikës së Kosovës në Tiranë. Jemi edhe në prag të hapjes së procedurave ligjore edhe në Gjermani, Zvicër, në ShBA. Pra jemi të vendosur që të shkojmë deri në fund, dhe fundi do të jetë atëherë, kur unë e shoh Xhavit Halitin, Bujar Bukoshin në rend të parë dhe Isa Mustafën prapa grilave të burgut të Dubravës, dhe jo në postet të cilët ata mbajnë sot. Një pjesë e mirë e këtyre që po i përmendi janë të rrumbullakuar në vijë të kuqe, nga presidenti i ShBA-ve Barak Obama, që e kanë të ndaluar edhe hyrjen në ShBA. Kur unë kam folur për Xhabir Zharkun, për Sami Lushtakun etj, ka qenë një akuzë që Musa shpifë, por nga ShBA-të rrumbullakohen si kriminelë, kurse këtu në Kosovë janë në pozita të larta shtetërore, dhe pretendojnë ta dërgojnë Kosovën në BE e OKB. Vetëm përgjimet e fundit që i ka dëgjuar mbarë populli, tregojnë haptas se kush janë ata.

Kosova Info: Cila do të ishte rruga më e mirë që ky Fond të zbardhet një herë e mirë?

Musa Daka: Më së miri është që në kuadër të Ministrisë së Financave të krijohet një Komision Parlamentar, i cili mund të merret me këtë hetim, dhe të kërkojnë llogari nga Isa Mustafa e Bujar Bukoshi. Nëse këta të dy nuk e kanë keqpërdorur Fondin, unë jam në gjendje që të vijë nga ShBA-të dhe të dal publikisht, në mjete të informimit t’u kërkojë falje publike, madje edhe t’u nënshtrohem dënimeve të cilat përcaktohen me Kushtetutë.

Kosova Info: Z. Bukoshi disa herë ka deklaruar se i ka faktet se ku ka shkuar Fondi i 3%?

Musa Daka: Ai e përdorë atë gënjeshtër, e të njëjtën e ka përdorur edhe dje Isa Mustafa, në prononcimin e Haki Rugovës, se i kanë dhënë llogari Parlamentit dhe institucioneve vendore për këtë fond, por kjo është një gënjeshtër e pastër. Dihet si jepet llogaria bankare, nxjerrët xhirollogaria, sa mjete kanë hyrë, sa kanë dal, sa janë shpenzimet dhe sa janë balance. Dhe kjo i dorëzohet ministrisë së sotme të Financave. Këta është dashur ta bëjnë këtë punë në qeverinë e Bajram Rexhepit, e lere më që nuk e kanë bërë as tash.

Kosova Info: Sa mjete të këtij Fondi deri më tani i keni bërë publike?

Musa Daka: Deri më sot i kam bërë publike rreth 15 milionë marka gjermane, dhe huaja popullore, janë publikuar sasi të mëdha dhe tani kanë filluar edhe komisionet tjera nëpër Evropë që të merren me këtë. Çështja e Fondit të 3%, është jetike, jo që unë do të përfitoj diçka, por do ta zbardhim se ku ka shkuar djersa e popullit, ku kanë shkuar paratë e punëtorëve tanë që e kanë ndarë nga kafshata e gojës, kush është dorasi i Ahmet Krasniqit, Ilir Konushevcit, i Enver Malokut, Xhemalj Mustafës, pra ku kanë shkuar mbi 2 miliardë marka gjermane. Për të gjitha këto, unë jam i vendosur që t’i qesë edhe në gjykatën e New Yorkut, të Gjenevës, të Shtutgardit. Pra unë nuk do të ndalem në drejtësinë e Kosovës, në të cilën unë nuk besoj fare. Aq më tepër më është shtuar kjo bindje, kur është marrë akti politik kundër dorëheqjes së presidentit Sejdiu, në vitin 2010, që në mënyrë direkte Gjykata Kushtetuese e Kosovës, ka marrë një vendim politik, për t’ia lënë duart e lira Thaçit, që t’ua jap një autonomi veriut të Kosovës, pa pasur të drejtë përmendjen e Luginës së Preshevës. Kjo është e vërteta që unë e di. Por këtë më së miri duhet ta thotë Sejdiu vetë, Thaçi dhe Enver Hasani vendimin të cilin e ka marrë.       

Kosova Info: A  i është tërhequr ndonjëherë vërejta Sejdiut, që të mos i afrojë në LDK, Isa Mustafën e Bujar Bukoshin?

Musa Daka: Unë jo, por disa miq të mi anëtarët e LDK-së, i kanë sugjeruar se një përafrim i tillë mund t’i hakmerret, jo vetëm Fatmir Sejdiut, por edhe partisë në tërësi. Nuk e di se çka e ka shtyrë Sejdiun që ta bëjë një gjë të tillë. Ai gabim u pa dhe tashmë është i qartë se ju ka hakmarrë. Të njëjtën gjë e kemi bërë edhe me ardhjen e Bujar Bukoshit në Ministrinë e Shëndetësisë, ku sot ai përgjigjet penalisht, jo për burrëri ,por për hajni, jo për trimëri, por për pabesitë që i ka bërë ndaj shtetit.  

Kosova Info:
Thoni se keni informata se Sejdiu ka dhënë dorëheqje nga posti i presidentit, për shkak se nuk ka pranuar kompromise për veriun?      

Musa Daka:
Unë nuk mund të flas në emër të Sejdiut, por mund të them atë se çfarë unë e di. Në bazë të informatave, jam i sigurt se janë të sakta, Sejdiu nuk ka pranuar të ketë kompromise për ndonjë autonomi politike për serbët në Kosovë, sepse, sipas tij, ka qenë kapitull i mbyllur pavarësia e Kosovës. Kompromisin më të madh që kanë mundur ta bëjnë lidershipi ynë, e edhe Sejdiu në këtë rast është plani i Ahtisarit. Më tepër, Sejdiu e ka pa të rrezikshëm çështjen e kufijve tanë. Vetë konflikti i tij mes Thaçit, apo Skënder Hysenit dhe stafit të këshilltarit të Thaçit, dhe kur nuk iu prit atyre që të kthehen në Prishtinë, e të marrin një vendim politik, por këtë e bënë nga New Yorku, është përgjigja e saktë dhe qartë se Sejdiu ka qenë pikërisht ai që ka ra viktimë e këtyre që po ndodhin sot. Është vet Thaçi që i ka mohuar takimet me Tadiqin, e kur Ardian Gjini nga AAK e ka akuzuar nga foltorja e Kuvendit se është takuar me të, e pas një kohe Thaçi pranon se është takuar në Tadiqin. Ka pasur bisedime se a do të emërohet Republika Serbska, a do të jetë autonomi politike, apo status i veçantë, dhe se serbët do të jenë qytetarë super të privilegjuar, siç janë që 20 vjet, nuk paguajnë tatim, nuk paguajnë kurrfarë shërbimesh.

Kosova Info: A mendoni se Kosovën do ta pret fati i njëjtë me Bosnjën, edhe pse liderët deklarohen se nuk do të ketë ndryshim të kufijve?

Musa Daka: Ata thonë se kufiri i Kosovës është i paprekshëm, por njëkohësisht edhe kufiri i Bosnjës është i paprekshëm, por dihet se brenda në atë Bosnjë ekziston Republika Serbe, ku e ka edhe presidencën e vet. Prandaj duhet të lihen këto pafytyrësi që qeveria jonë po i përdorë sot. Thuhet se kufiri është i paprekshëm, por kjo nuk ka dyshim se kanë filluar bisedimet me Daqiqin dhe po bëhen kompromise për autonominë e veriut. Prandaj, jo vetëm që po ndodh rasti i njëjtë si i Bosnjës në Kosovë, por është një kapitull i kryer. Me lirimin e Ramush Haradinjat nga Tribunali i Hagës, Thaçi e ka më të lehtë që ta zyrtarizojë atë autonomi.

Kosova Info: Ju po thoni se edhe lideri i AAK-së Haradinaj është në mbështetje të Thaçit, për kompromise?

Musa Daka:
Është deklaruar vetë, se i përkrahë bisedimet me Serbinë, i gatshëm të jetë përkrah qeverisë aktuale, dhe është në pritje të marrjes së postit të kryeministrit.

Kosova Info: Z. Daka keni thënë se një shtet mik i Kosovës po negocion për statusin e veriut të Kosovës, cili është ai shtet?

Musa Daka: Në vitin 2010, ka qenë një udhëtim i kryeministrit Thaçi në Turqi, në kohën kur Presidenti Sejdiu dhe ministri i Punëve të Jashtme Skënder Hyseni qëndronin në New York. Dhe prej aty ka udhëtuar për në Bruksel, ku e ka marrë edhe një lloj pëlqimi edhe nga Baronesha Ashton, dhe ardhja e tij në New York përkon me ndërrimin e Rezolutës në OKB, ku Jeremiq e ndërron Rezolutën për Kosovën. Me vet faktin që Thaçi sot shkon se bisedon gati çdo ditë për Kosovën me Serbinë në Bruksel edhe për serbët e veriut, apo iu jep me qindra hektarë manastireve dhe kishave serbe, pa guxuar ta përmend Luginën e Preshevës, tregon se kush janë ndërmjetësuesit. Komuniteti ndërkombëtar është lodhur me lidershipin tonë dhe me pafytyrësitë e tyre, prandaj ata nuk kanë dobi të merren me neve me dekada dhe të hyjnë në armiqësi me Rusinë apo ta kenë pengesë Kosovën me Kinën, me Indinë etj, për shkak te 3-4 komunave të Kosovës, dhe për shkak të joseriozitetit të qeverisë aktuale dhe të opozitës deri diku. Ashton, ndërmjetëson në bisedimet mes Kosovës dhe Serbisë për statusin e serbëve në veri, dhe jo për diçka tjetër. Por në këtë rast, mendoj se edhe Turqia dhe Anglia kanë qenë shtete mike me Kosovën dhe janë, por që e shohin si periferike statusin e serbëve, jo ndonjë rrezik të madh, e që unë mendoj se është një tumor që do të shndërrohet në kancer.

Kosova Info: Cili është interesi i Turqisë dhe Anglinë në këtë rast?

Musa Daka: Dominimi i Turqisë siç po e shohim të gjithë në fushën ekonomike dhe në atë politike në Ballkan, dhe në këtë rast është e qartë  se BE-së do që t’i normalizoj raportet me Rusinë, sepse kanë probleme të mëdha të pazgjidhura, siç është rasti i Iranit, Irakut, Afganistanit, etj, etj, dhe që e shohin joseriozitetin tonë dhe qëndrueshmërinë tonë, ku e shfrytëzojnë këtë rast.    

Kosova Info: Z. Daka ju keni thënë se shumë ish të burgosur politikë të vendit janë burgos në bazë të dëshmisë së një zyrtari të lartë të tashëm shtetëror. Për cilin zyrtarë e keni fjalën dhe kush janë ata zyrtarë që janë dënuar?

Musa Daka: Mua më habit fakti se si Jakup Krasniqi është bashkë me Xhavit Halitin në një parti dhe në Kuvend, ku ky i fundit është nënkryetar i Parlamentit të Kosovës, dhe në bazë të dëshmive të Halitit, është dënuar Krasniqi asokohe dhe ka vuajtur dënimin, kurse tani janë partner. Nuk e di se çfarë i ka shtyrë dhe nuk e di se çfarë burrërie janë duke treguar Hydajet Hyseni, apo të tjerët që janë në Parlament, ku nënkryetar e kanë një njeri, i cili me të dhënat e tij, dhe me dëshmitë e tij, janë dënuar ky grup në atë kohë që njihet si grupi i Hydajetit. Kurse tani Xhavit Haliti është një farë lloj bosi në partinë e tyre.

Kosova Info: A keni dëshmi se të lartpërmendurit janë burgos me dëshmitë e Xhavit Halitit?

Musa Daka: Inspektorët e Sigurimit Shtetëror të asaj kohe që e kanë bërë burgosjen e Jakup Krasniqit, janë mirë të njohur për Krasniqin, janë të gjallë dhe jetojnë në Prishtinë, madje kanë qenë edhe shokë shkolle të Jakupit dhe nuk janë të ekzekutuar siç ka ndodhur me disa raste. Pra ata inspektorë i kanë dëshmitë dhe janë të njëjtit persona që i kanë dhënë pasaportën Xhavit Haliti, ku Haliti thotë se kam ikë nga burgu dhe kam dal në Zvicër. Është e kundërta, atij i është dhënë pasaporta dhe ka dal jashtë, e më pas është futur në Lëvizje.

Kosova Info: Z. Daka, keni deklaruar se Fondi i 3% është transferuar në Bankën për Biznes e më pas në atë Ekonomike, pse?

Musa Daka: Me djallëzitë e Bukoshit, Fondi është shndërruar në UFORK, dhe prej aty bartet në Bankën e Biznesit me xhirollogari në Prishtinë. Me këtë Bukoshi i është përgjigjur autoriteteve gjermane, se të hollat do t’i bartë në Prishtinë, në mënyrë legale dhe ka autorizuar njerëz që në mënyrë legale t’i tërheqin ato para, e që për mua është mënyrë ilegale. E gjithë kjo të dërgon tek Naser Osmani dhe tek Atdhe Gashi.

Kosova Info: Pse së fundmi ky Fond ka kaluar në Bankën Ekonomike?

Musa Daka: Nuk është me rëndësi Banka, me rëndësi është burimi i pashtershëm i tyre që vjen nga Gjermania në Kosovë dhe bosët hapin xhirollogari të reja çdo ditë. Pra me rëndësi është se burimi është nga Fondi i Republikës së Kosovës në UFORK.

Kosova Info: A keni fakte se edhe sot po tërhiqen mjete nga ky Fond?

Musa Daka: Unë kam fakte, faktet i ka edhe prokuroria edhe pse jam akuzuar si gënjeshtarë, por kur i kam bërë publike atëherë e kanë pranuar që ekziston ende Fondi, një gjë e tillë do të ndodhë edhe në vitit 2013. Prokuroria pasi që i ka faktet duhet të bëjnë arreste, edhe pse unë nuk kam besim tek drejtësia kosovare. Por sa ka drejtësi në Kosovë dhe tek EULEX-i, mund ta them këtë, se deri më sot nuk ka ndodh asnjë burgosje për krimin ekonomik apo politik që ka ndodh në Kosovë. Një gjë mund ta them se Xhavit Haliti dhe Bujar Bukoshi janë shefat dhe bosët e krimit në Kosovë, kurse Isa Mustafën e kanë pasur një burim të pashtershëm të Fondit, që edhe sot vazhdon t’i kontrollojë, dhe njëherit është i ashtuquajtur shef i opozitës. Pra, në fund mund të them se Fondi në fjalë ende është duke u shfrytëzuar për qëllime personale të të lartpërmendurve.

Kosova Info: A ka kërkuar Sali Çeku zhbllokimin e mjeteve, dhe si i janë përgjigjur Bukoshi e Mustafa për këtë çështje?

Musa Daka: Po, apeli i Çekut ka qenë për zhbllokimin e mjeteve, sepse ankohej para Kuvendit në Shtutgard të Kolegjiumit të Degëve që nuk kanë mjete jo vetëm për armatim, por as për ushqim. Prezent ka qenë dhe Isa Mustafa në sallë, ku më kujtohet shumë mirë dhe për hir të kësaj çka po ndodh sot më duhet ta ceku edhe një emër, Ibish Rugova, që ishte përfaqësues i degës së Austrisë, po ashtu në kolegjium të degëve. Ibishi është vëllai i Haki Rugovës nënkryetarit aktual të LDK-së. Ka qenë një tentim i konfrontimit fizik të tij nga sjellja despote e Isa Mustafës i cili me një gjakftohtësi, a po me një pagjakësi nuk përgjigjej fare rreth mjete dhe pse ishte ministër i Financave. Dhe aty kanë dal propozimet e ndryshme si të formohet një fond i ri për ta financuar luftën, përkundër asaj që i kishim milionat në fondin e Republikës së Kosovës, ku nuk jemi pajtua me atë, për shkak të apelit të vazhdueshëm të Aganit dhe të tjerëve që të mos krijojmë një përçarje përbrenda LDK-së dhe me insistimin e kryetarit Rugova. Në fund Sali Çeku është kthyer shumë i dëshpëruar ku edhe fatkeqësisht pas disa muajve vritet në luftë.

PËRGJIGJU

Ju lutemi shkruani komentin tuaj
Ju lutem vendosni emrin tuaj ketu