Intervista e plotë: Xhaferi: Do ta rikthejmë Tetovën dhe Gostivarin

0
910

“Është e vërtetë se një konkurrencë më praktike dhe më objektive do të na bëjnë në Gostivar dhe Tetovë, kurse në qytetet e tjera gati se ata nuk arrijnë të hyjnë as si pretendentë, pra janë larg me mbështetje. Nëse i marrim këto dy qytete, ne qëndrojmë më mirë sipas sondazheve të vitit 2009 dhe kur them se ne qëndrojmë më mirë, do të thotë që kundërshtarët qëndrojnë më poshtë, sepse nuk mund të jenë të dyja palët të avancuara. Është legjitime që ne t’i rikthejmë qytetet në Pollog”, thotë për “Zhurnal plus”, zv/kryeministri Musa Xhaferi

Intervistoi: Fami BAJRAMI

Në intervistën e fundvitit për “Zhurnal plus”, zëvendëskryeministri për Implementimin e Marrëveshjes së Ohrit dhe zyrtar i lartë i BDI-së, Musa Xhaferi, shprehet i sigurt se kjo parti do të rikthejë dy komunat qendrore të Pollogut – Tetovën dhe Gostivarin. Parashikimet e tij, Xhaferi i bazon në sondazhet e bëra dhe në informacionet nga terreni që flasin për pakënaqësi nga puna e krerëve të tanishëm aktualë. Duke folur për zhvillimet lidhur me buxhetin që përmbyllën vitin 2012, Xhaferi ka dënuar qëndrimin dhe veprimet destruktive të opozitës maqedonase, ndërsa e ka cilësuar të dëmshëm për vendin bojkotin e punimeve të institucionit ligjvënës. Zëvendëskryeministri ka folur në këtë intervistë edhe për bashkëpunimin me partitë e tjera shqiptare, procesin e integrimeve dhe Marrëveshjen e Ohrit…

“Zhurnal plus”: Votimi i Buxhetit të shtetit kaloi e shoqëruar me protesta dhe incidente brenda dhe jashtë Parlamentit, ku si protagoniste ishte LSDM-ja opozitare në krye me Branko Cërvenkovski. A i duhej një rezistencë e tillë LSDM-ës të bëjë bllokimin e miratimit të Buxhetit?

Xhaferi: Në fakt, ngjarjet që ndodhën në Parlament përhapin një fotografi jo të këndshme për imazhin e shtetit. Atë mundësi e kishte opozita socialdemokrate e cila u radikalizua dhe e teproi me bllokadën. Situata u tensionua kur ata filluan të bëjnë pengesa edhe në komisionet parlamentare, të protestojnë, të heqin mikrofonat nga folësit, të rebelohen…Pastaj, një natë përpara se të shkojë në seancë plenare projektbuxheti, u zotuan se nuk do të lejojnë me asnjë kusht të sillet buxheti dhe faktikisht ishte një paralajmërim se opozita dëshiron me çdo çmim të bllokojë sjelljen e tij. Faktikisht, një rezistencë e tillë për çështjen e buxhetit nuk ka pasur deri tash, ndonëse ka pasur për ligje të tjera, për tema të tjera të nxehta, që mund të jetë ndoshta më e pranueshme, por për buxhet jo. Një është e vërtetë se shumica, ajo që e ka pushtetin, e propozon dhe sjellë buxhetin. Kjo ndodh në çdo vend. Opozita, edhe sikur të ishte buxheti më i mirë, e kritikon atë dhe ka propozimet e veta që mund të harmonizohen ndokund. Por, në esencë, pjesën më të madhe të vendimeve për buxhetin e sjellë shumica. Këtu kishim një rast të veçantë ku opozita kërkonte me çdo kusht ta diktonte buxhetin, gjë që shihej prej fillimit se nuk do të ketë marrëveshje.  Ajo që opozita tentonte ta thyejë kordonin e policisë për të bërë rrëmujë, ishte porosia se ata do të hynin në Parlament dhe kjo është shumë skandaloze. Institucionet duhet të mbrohen dhe policia është e detyruar ta bëjë këtë. Policia vepron me komandë, në rrugë nuk ka kompromise. Për fat të keq, u krijua një atmosferë e keqe, e cila do të marrë kohë dhe punë për ta shëruar. Duhet të shohim në të ardhmen se sa do të jenë të gatshme palët të zhvillojnë një dialog rreth asaj se kush gaboi më shumë, kush ofendoi, kush kë e shtyri, çka nuk është respektuar etj…E vetmja rrugëdalje mbetet dialogu për ta tejkaluar këtë situatë të dëmshme.

“Zhurnal plus”:
Sipas jush, cilat do të ishin pasojat e mosmiratimit të buxhetit. A mendoni se do të rrezikohej organizimi i zgjedhjeve lokale?

Xhaferi:
Në fakt, mossjellja e buxhetit, gjegjësisht funksionimi me një buxhet teknik dhe vazhdimi i debatit për ta sjellë atë pas konsumimit të të gjitha amendamenteve, ndoshta për dikë do të ishte mënyra pak më e butë, mirëpo përderisa pengohej dhe nuk kishte atmosferë në komision për t’u debatuar për amendamentet, nuk kishte rrugë tjetër. Mossjellja e buxhetit do të shkaktonte vonesa në pagesa që i ka shteti ndaj klientëve të vet dhe faktikisht do të kishim një bllokadë, një rënie të qarkullimit në kushte kur edhe ashtu është një krizë e përgjithshme. Zaten edhe opozita mendonte ta bllokojë sistemin dhe të krijojë një gjendje ku do të mundë ta plasonte në publik tezën se Qeveria është e paaftë, se ajo duhet të shkojë dhe të imponojë situata nga të cilat do të përfitonte pikë politike. Plus, ne jemi në prag të shpalljes së zgjedhjeve lokale dhe ishte një dilemë se si do të paguhen zgjedhjet lokale dhe si do të zhvillohen ato, duke rrezikuar të prolongoheshin.
Pastaj, të hysh në një situatë ku nuk i dihej fundi dhe imponimi që “këtë buxhet nuk do ta lejojmë me asnjë kusht të sillet”, ishte një porosi shumë e rrezikshme. U bënë edhe përpjekjet për një kompromis, u pranua një pjesë e amendamenteve, kishte zotime nga ana e Qeverisë që huamarrjet të mos i prekte derisa të kryhen zgjedhjet, gjë që edhe ligji e kufizon kur shpallen zgjedhjet, pasi funksionon vetëm teknikisht dhe me shpenzime teknike. Por një të mirë kishte nga gjithë kjo e keqe dhe kjo është se atë ditë nuk pati një konflikt që kishte dimension ndëretnik. Kjo e kurseu pak situatën se po të kishte edhe atë dimension, situata do të rëndohej dhe më tepër.

“Zhurnal plus”:
Çfarë mund të presim tani prej opozitës? A prisni se ajo do të mundë t’i bojkotonte zgjedhjet?

Xhaferi: Në fakt nuk e di sa qëndron argumenti se me shpalljen e sondazheve nga Instituti Republikan Amerikan (IRI), opozita u irritua aq shumë sa që atëherë i morën masat radikale dhe u bë më e lexueshme dhe me çdo kusht tentonte të krijonte ndonjë anarki dhe krizë, të përfitojë eventualisht ndonjë pikë ose t’i bllokojë zgjedhjet. Pastaj, kërcënimet se me këtë Qeveri nuk mund të shkohet në zgjedhje, masat e ndërmarra për protesta në rrugë të cilat mund të shkaktojnë një anarki totale, dhe mbi të gjitha bojkotimi i punës së Kuvendit, janë veprime të papëlqyeshme në praktikat demokratike. Andaj, ata do të përgjigjen para opinionit të brendshëm dhe të jashtëm se pse ata kanë zgjedhur rrugën e bojkotimit të seancave dhe deri te kërcënimi që nuk do të marrin pjesë në zgjedhjet lokale, që në fakt, nuk obligohen me ligj. Ky është opsion i tyre që mund të jetë shumë fatal për ata. Ne nuk guxojmë ta lusim opozitën deri në pafundësi që të marrë pjesë në zgjedhje, plus bëhet fjalë për zgjedhje lokale. Faktikisht, lufta bëhet në beteja lokale, nuk bëhet në betejë qendrore.

“Zhurnal plus”:
Në prag të zgjedhjeve lokale, dihen poshtë-lartë kandidaturat për kryetarë komune në radhët e BDI-së. Më 10 janar duhen të rrumbullakohen kandidaturat, përfshi edhe bartësit e këshillave? Deri ku janë punët në këtë drejtim, a ka ndonjë të vërtetë në informatat sensacionale që janë thënë në media?

Xhaferi: Ne kemi respektuar procedurën e propozimeve që kanë ardhur nga degët. Në anën tjetër, bëjmë dhe marrim opinionet nëpërmjet anketimeve dhe anëtarësisë se cilët janë kandidatët e mundshëm nga ana e BDI-së, që janë më favoritë dhe që sjellin më shumë vota, gjegjësisht cilët janë kandidatët që e bëjnë fitues BDI-në. Ne jemi në atë pikë, i kemi hedhur në garë shumicën e anëtarëve tanë në baza lokale, në mënyrë shumë transparente, pa krijuar konflikte të brendshme dhe kemi marrë orientime preliminare se kush janë më favoritë. Nuk kemi nevojë të ngutemi për arsye se nuk është aq e ngutshme, sepse ka mjaft kohë, është më mirë ta pjekim me kohë, t’i harmonizojmë qëndrimet brenda strukturave dhe të përgatitemi mirë, për arsye se BDI-ja është pretendent të fitojë shumicën e pushtetit lokal dhe gjasat janë objektive. Në kuadër të kësaj ne nuk do të krijojmë ndonjë situatë që mund të na hakmerret. Pastaj përgjithësisht dhe në mënyrë të veçantë do të kemi një qytet, një komunë urbane siç është Kërçova, e cila kërkon përpjekje plus dhe nuk do të tingëllonte tepër ambicioze nëse BDI-ja do t’i merrte të gjitha komunat në bazë të punëve që ka bërë. Sondazhet janë të atilla dhe e gjithë kjo e bën situatën më serioze që ne t’i bëjmë të gjitha anketimet, t’i marrim të gjitha opinionet dhe të përcaktohemi për kandidatët fitues e jo të marrim vetëm vendime politike.

“Zhurnal plus”:
A mund të thuhet se qëndroni më mirë se në zgjedhjet e kaluara të vitit 2009? Informatat janë se kanë ndryshuar gjërat në favorin tuaj në bastionet kryesore të shqiptarëve siç është Tetova po edhe Gostivari, pa anashkaluar edhe Kërçovën dhe Strugën. Megjithëse, në Kërçovë,  vendimtare duhet të jenë votat e mërgimtarëve. Ju ishit në një turne në vendet perëndimore së bashku me kryetarin e BDI-së, Ali Ahmeti, dhe alarmuat për këtë çështje…

Xhaferi:
Është e vërtetë se një konkurrencë më praktike dhe më objektive do të na bëjnë në Gostivar dhe Tetovë, kurse në qytetet e tjera gati se ata nuk arrijnë të hyjnë as si pretendentë, pra janë larg me mbështetje. Nëse i marrim këto dy qytete, ne qëndrojmë më mirë sipas sondazheve të vitit 2009 dhe kur them se ne qëndrojmë më mirë, do të thotë që kundërshtarët qëndrojnë më poshtë, sepse nuk mund të jenë të dyja palët të avancuara. Është legjitime që ne t’i rikthejmë qytetet në Pollog. Nga një aspekt u bë një praktikë për votuesit se si do të jenë këto qytete nëse nuk i menaxhon BDI-ja, dhe nuk kemi rezultate që mund të na befasojnë, pra rezultate pozitive. Për shembull ta marrim Tetovën, si qytet më i madh. Atje ka një kaos me çështjen e mbeturinave edhe krahas shumë alarmimeve në shtyp, megjithëse ne kemi bërë oferta si pushtet qendror për rregullimin e çështje së mbeturinave që po e mbysin qytetin e Tetovës. Pastaj, është pritur nga elektorati që duhet të rregullohet çështja e ujit të pijshëm, që nuk u bë, e të mos flasim se të gjithë që shkojnë dhe hyjnë nëpër qytet hasin në një kaos të paparë të trafikut. Nuk u lirua asnjë rrugë, nuk është bërë siç duhet asnjë unazë, faktikisht qytetarët kanë të drejtë të zhgënjehen nga menaxheri aktual dhe ne nëse synojmë ta marrim këtë qytet, do të ndërtojmë prioritetet tona se çfarë duhet të bëjmë që qyteti të funksionoje më mirë, që qyteti të jetë më i lirë, më i pastër dhe kur të vijë vera të mos ketë mungesë të ujit. Ky është fundi dhe nuk durohet kjo gjendje, për atë arsye ne mendojmë se votuesit do të reflektojnë dhe do t’ia japin votën kandidatit të BDI-së, për arsye se ata të tjerët e provuan dhe nuk arritën t’i realizojnë këto tri çështje më kryesore: mbeturina, uji i pijshëm dhe trafiku. Të mos flasim për urbanizmin në përgjithësi, rregullimin e shkollave, çerdheve, sportin lokal…ka shumë tema e çështje, të cilat i preokupojnë qytetarët.

“Zhurnal plus”: Flitet për bashkëpunim eventual në nivel lokal mes jush, si parti më e fuqishme te shqiptarët, dhe partive të tjera, përfshi RDK-në por edhe DR-në. Sa janë të vërteta informacionet e tilla?

Xhaferi:
Ne kemi dalë me një qëndrim në parti që në komunat ku shqiptarët nuk janë pretendentë për kryetarë komune, partitë shqiptare, pa përjashtim, duhen të dalin me një listë të përbashkët të këshilltarëve që të shfrytëzojnë maksimalisht votën dhe të jenë pjesë e këshillave. Si pasojë e mosharmonizimit, në Veles, Prilep, Manastir, Resnjë, Ohër, Mavrovë, Kumanovë, Gazi Babë, Butel përfaqësimi me këshilltarët nuk është në përpjesëtim të drejtë me numrin e votës. Ne u kemi bërë thirrje partive të tjera pa ndonjë kërkesë të veçantë që të dalim me një listë, kurse sa u përket komunave ku shqiptarët janë pretendent ta udhëheqin komunën ne e quajmë legjitime që të bëjmë garë edhe pse ne nuk përjashtojmë ndonjë koalicion nëse ka dhe përputhen interesat ndokund në mes partive shqiptare. Mirëpo, kjo është minimumi që ne ofrojmë dhe kjo do të pritet mirë nga elektorati dhe mund të ketë si efekt rritjen numrit të këshilltarëve duke ndikuar në këtë mënyrë në vendimet që sjellë komuna.

“Zhurnal plus”: Maqedonia nuk mori datë për negociata me BE-në dhe sikur i gjithë faji u hodh te përfaqësuesi juaj që udhëheq me integrimet, Teuta Arifi. Në fakt, edhe opozita e shfrytëzoi këtë për t’ju sulmuar ju? Cili është komenti juaj për epilogun e Samitit të BE-së?

Xhaferi: Në kuadër të pritjeve, duke pasur parasysh konfliktin dhe kontekstin me grekët, nuk duhej të pritet më shumë. Nuk duhej të kemi iluzion, dhe pse kemi kërkuar variante të ndryshme, për të marrë datë pa pasur një zgjidhje me grekët. Paraprakisht, ka pasur një Dialog të Lartë i cila ka qenë forma më e avancuar që pa datë të shtyhen proceset përpara. Kurse sa i përket BDI-së, janë disa porosi që kemi dashur t’i dërgojmë për shembull një që nuk qëndron ajo që ne na interesojnë vetëm temat etnike të brendshme, na interesojnë edhe temat që janë me interes shtetëror siç janë integrimet dhe ne kemi dëshmuar duke marrë pozicione dhe përgjegjësi politike konkretisht, Sekretariatin për Çështje Evropiane dhe Ministrinë e mbrojtjes.
Kemi dhënë maksimumin prej kapaciteteve tona, si faktor, së bashku me partnerët tanë të koalicionit, por ne kemi qenë në front që t’i shtyjmë këto procese përpara po kjo nuk do të thotë që përgjegjësinë e ka ekskluzivisht BDI-ja, sepse këtu nuk varet vetëm nga ne, ka të bëjë edhe me çështjen e emrit. U tregua që ne ishim më fleksibilë për të komunikuar për gjërat dhe për ta shtyrë procesin për të qenë më depërtues që t’ju ikim atyre etiketimeve nacionale që mund t’i bëjmë, se pse nuk bisedoi ky apo ai me një përfaqësues të Qeverisë, i cili është me prejardhje etnike maqedonase jo shqiptare etj. Dhe, raporti i fundit krijon një hapësirë që lë hapur mundësinë për një dialogun të dyanshëm edhe me fqinjët por edhe t’i shtyjmë çështjet përpara, që i kemi si obligime ndaj BE-së dhe integrimit tonë, dhe kjo nuk duhet të merret si diçka tragjike se u bë ndonjë gabim dhe ne stagnuam.

“Zhurnal plus”:
Në të gjitha prononcimet tuaja keni thënë se Ligji për “branitellat” nuk do të kalojë në Parlament. Subjekti juaj ka paraqitur shumë amendamente, pra janë rreth 15 mijë që kanë bllokuar deri sot debatin mbi këtë projektligj. Si mendoni se do të vijojë ky debat por dhe nëse ekziston mundësia të integrohet në të edhe zgjidhja për ish-pjesëtarët e UÇK-së?

Xhaferi: Kemi përsëritur disa herë për t’ia bërë të qartë dhe për të bindur opinionin, se ligji i a.q. i ‘branitellave’ nuk duhet, e potencoj, nuk duhet të kalojë ashtu siç është dhe nuk do të kalojë. Ka një variant dhe kjo është nëse teksti kalon si i tillë do të rikthejë mbrapsht shumë gjëra, do ta rikthejë shumë larg situatën dhe faktikisht nuk do t’i shërbejë askujt. Përkundrazi, do të shërbejë në drejtim të keq. Ne i kemi përdorur të gjitha mekanizmat edhe për ta bllokuar por edhe për t’i bindur të gjitha palët se një tentim i tillë i sjelljes së këtij ligji vetëm për njërën palë, është varianti më i rrezikshëm dhe varianti më i dëmshëm për Maqedoninë.
E kundërta e kësaj, është që ne në të ardhmen të gjejmë një solucion dhe një zgjidhje të përbashkët që të gjithë ata që kanë pësuar nga konflikti, t’u kompensohen dëmet në atë mënyrë që ka mundësi shteti. Kjo do të ishte zgjidhja më fatlume që ne jemi afruar si temë edhe pse ka konflikte, por është si temë që bisedohet në rrethana më relaksuese. Unë besoj që partnerët e koalicionit do të gjejnë forcë dhe guxim politik që ta tejkalojnë dhe zgjidhin këtë çështje, të gjejnë një kornizë e cila e kalon dhe ne nuk i kthemi kurrë më kësaj teme që do të ishte shumë e favorshme dhe për klimën politike këtu. Kjo është edhe një prej sfidave të Marrëveshjes së Ohrit për mosdiskriminim e të gjitha palëve për një amnisti të përgjithshme në çdo aspekt dhe amnistia nga aspekti social, ekonomik, politik, juridik. Një pjesë është arritur, pjesa juridike është arritur dhe tani duhet të ndodhë edhe amnistia tjetër, gjegjësisht t’u kompensohet dëmi të gjithë qytetarëve të dëmtuar në luftë, pasi ata duhet të trajtohen në mënyrë të barabartë nga shteti.

PËRGJIGJU

Ju lutemi shkruani komentin tuaj
Ju lutem vendosni emrin tuaj ketu