“Kolonizohet” Bujanoci

0
750

Në komunën e Bujanocit brenda një kohe të shkurtër do të nisë ndërtimi i 20 banesave sociale, të dedikuara kryesisht për serbët e zhvendosur nga Kosova gjatë viteve 1999. Ky vendim, të cilin para dy dite e ka marrë koalicioni aktual shqiptaro-serb nën udhëheqjen e kryetarit shqiptar, Nagip Arifi, ka zgjuar reagimet e këshilltarëve opozitarë shqiptarë.

Ish-kryetari i Bujanocit, Shaip Kamberi, gjatë një bisede për “Zërin”, thotë se ky vendim për ndërtimin e banesave sociale për serbët e Kosovës sjell një kolonizim, e madje është në kundërshtim me vetë Kushtetutën e Serbisë.

Fillimisht, sipas tij, kjo komunë është një vend i pazhvilluar ekonomikisht e cila nuk po ka aftësi që të i kthejë as njerëzit e vet, shqiptarët, që dikur nga frika gjatë bombardimeve të viteve 1999, janë larguar nga Bujanoci dhe sot janë të shpërndarë nëpër Kosovë.

Kamberi thotë se bëhet fjalë për banorët e malësisë së Bujanocit, të cilët përbëjnë rreth 3 mijë veta, dhe për këta të mjerë që 13 vjet nuk ka menduar askush, as Qeveria e Serbisë e as bashkësia ndërkombëtare.

“Ndërkohë që për serbët e Kosovës, të cilët as që janë nga Bujanoci, merret vendim për t’iu ndërtuar shtëpi. Një vendim i tillë, po ashtu nuk do të duhej të merrej, edhe pa u konsultuar me Qeverinë e Kosovës, për t’i pyetur ata se mos këta persona duhet të kthehen në Kosovë, apo mos kanë probleme me ligjin dhe nuk mund të kthehen”, tha Kamberi.

Ndërsa, analisti nga Lugina e Preshevës, Belgzim Kamberi, thotë se ky vendim është vetëm fillimi i prodhimeve negative që do të sjell koalicioni aktual i Bujanocit.

Ai madje fajëson edhe partitë politike shqiptare, të cilët duke mos mundur që të merren vesh mes vete, kanë mundësuar që në Bujanoc faktor vendimmarrës të jenë pakicat serbe.

“Bujanoci ka hyrë në një proces, ku detyrohet të bëjë koncesione të tilla, nga fakti që serbët pakicë e kanë pushtetin, dhe kjo u mundësohet për shkak të vetë pushtetit serb në përgjegjësi, por është mundësuar edhe nga vetë shqiptarët. Përndryshe vendimi për ndërtimin e këtyre shtëpive është antikushtetues”, tha Kamberi.

Ndryshe, i kontaktuar nga gazeta, kryetari i Bujanocit, Nagip Arifin, jep tjetër version për këtë situatë.

Ai thotë se ndërtimi i këtyre shtëpive është projekt i Bashkimit Evropian (BE), dhe nuk ka të bëjë vetëm me serbët, por në përgjithësi me rastet sociale në Bujanoc, prej ngado qofshin ata.

“Është një projekt i BE-së, dhe në këto banesa sociale do të vendosen rreth 20 familje sociale që përbëjnë përafërsisht 70 persona. Këta persona janë edhe serbë nga Kosova por edhe romë”, tha Arifi.

Ndryshe, kryetari Arifi thotë se në të kaluarën, ish-kryetari i Bujanocit, Kamberi, i cili sot po e kritikon projektin, ka qenë vetë iniciues, por për shkak të zgjedhjeve lokale nuk ka arritur që ta realizojë.

Përndryshe, opozita në Bujanoc e përbërë prej 18 këshilltarëve nga Lëvizja e Progresit Demokratik, Partia për Veprim Demokratik dhe Unioni Demokratik Shqiptar, ka bojkotuar seancën kur është marrë ky vendim.

Ata kanë lëshuar një kumtesë të përbashkët për medie, ku thuhet se problemi i refugjatëve serbë të ardhur nga Kosova dhe viset e tjera të ish-RSFJ-së, po i shkakton telashe të mëdha kësaj komune.

Njëri prej këtyre probleme është edhe borxhi i krijuar për harxhimet e rrymës elektrike nga këto qendra kolektive, me ç’rast komuna e Bujanocit i ka borxh elektrodistribucionit të Serbisë mbi 30 milionë dinarë.

“Nisja e procesit të kolonizimit të Bujanocit, përveç opozitës, nuk ka nxitur asnjë reagim tjetër të asociacioneve civile. Askujt nuk po i pengon kjo”, thuhet në komunikatën e tyre.

 

Nga Besiana Xharra

PËRGJIGJU

Ju lutemi shkruani komentin tuaj
Ju lutem vendosni emrin tuaj ketu