Sekiraça: Nuk e organizova vrasjen e Triumf Rizës

0
738

Prishtinë, 16 tetor – Ka vazhduar publikimi i rrëfimit të Enver Sekiraçës në “Jeta në Kosovë”. Në vazhdimin e intervistës, Enver Sekiraça thotë se nuk ka pasur lidhje me vrasjen e policit Triumf Riza në gusht të vitit 2007.

“Triumfin e ka vrarë Arben Berisha (v.j. i dënuar si doras me 35 vjet). Unë e kam parë në gazetë që ai e ka vrarë”, ka thënë Sekiraça, ndërkohë që ka pranuar se me Rizën ishte përleshur më 2005.

I pyetur se a i ka dhënë ai urdhër Arben Berishës për vrasjen e policit Riza, Sekiraça është përgjigjur: “Pse t’i jap unë urdhër? Ai ushtar imi nuk është. Pse me e vra unë Triumfin? Nuk kam pasur arsye me e vra. Akuzohem (nga njerëzit) për këtë rast si organizator (v.j. i vrasjes), mirëpo kjo është trillim”.

Por ai pranon se ka pasur probleme me policin e ndjerë dhe e fajëson atë.

“Triumfi vetë ka lypë me pasë punë me mua e jo unë me të. Më ka sulmuar në ‘Swiss Casino’, ka nisur me më ra me kerr mbrapa Pallatit të Rinisë te Stacioni i Trenit…”, tha Sekiraça, duke akuzuar se shoqëruesit e Triumf Rizës e kishin plagosur atë më 2004.

Mirëpo babai i Triumfit, Shefqet Riza, përveçqë e bën Sekiraçën fajtor për vrasjen e të birit, thotë se familja edhe më tej merr kërcënime prej “bandës së Sekiraçës”.

“Kemi kërcënime edhe në shtëpi nga banda e Enver Sekiraçës. E kanë lënë letrën tek dera, madje kanë shkruar edhe mbi fotografinë e të vdekurit në derë, se gjoja ‘nëse nuk e lëshoni këtë banesë brenda 72 orëve, do t’ju likuidojmë të gjithëve’”, thotë Riza. “Në fund shkruante Allahu Ekber”.

I pyetur se ku e dinte që kjo letër ka ardhur nga Sekiraça, Riza tha: “Nuk ka kush tjetër, sepse familja ime me askënd tjetër nuk ka pasur problem. Djalin tim e ka vrarë Sekiraça”.

Sekiraça po ashtu mohon se i ka marrë haraç nga koncertet e saj këngëtares Adelina Ismajli, me të cilën polici Riza ishte në lidhje.

“Kurrë në jetë nuk jam marrë me haraç…as prej Adelinës”, tha ai. “Çka ka ajo pare me i marrë?! Unë me mujt me i ndihmu dikujt po, se me i marrë në atë mënyrë dikujt pare kurrë jo. Unë nuk jam i trentë”.

Këngëtarja Ismajli nuk ka pranuar të flasë, e kontaktuar nga gazeta.

Bardha Azari, zëdhënëse e EULEX-it, thotë se Enver Sekiraça është dorëzuar te policia e EULEX-it dhe se është arrestuar në bazë të fletarrestimit të lëshuar në vitin 20008.

“Për momentin po hetohet për tri akuza, përfshirë edhe vrasjen e policit Triumf Riza dhe po vuan edhe një dënim në Burgun e Dubravës për dy vjet, për dy vepra penale. Njëra është kërcënim dhe tjetra pengim i personit zyrtar në kryerjen e detyrës zyrtare”, tha Azari.

Dënimi ka të bëjë me një rast tjetër, të vitit 2007, i cili njihet si “Rasti i Ferizajt”, ku Enver Sekiraça ishte konfrontuar me pjesëtarë të Njësisë Speciale të Policisë së Kosovës. Rasti është vendosur me aktgjykim përfundimtar të Gjykatës Supreme të Kosovës.

PËRGJIGJU

Ju lutemi shkruani komentin tuaj
Ju lutem vendosni emrin tuaj ketu