Tito ka helmuar Stalinin?

0
891

Historiani slloven, Joze Pirjavec, pohon se Stalini ishte i helmuar nga një vrasës i paguar nga Tito. Lajmi raportohet nga agjencia ‘Telegrafi’ ndërsa e gjithë hipoteza e historianit slloven bazohet në një letër që Josif Stalin i ka dërguar një letër Byrosë Politike në vitin 1923, përmes së cilës informon se lideri tashmë i sëmurë, Vladimir Iliç Lenin, ka kërkuar nga ai një dozë të cianidit vdekjeprurës, për t’i dhënë fund agonisë dhe vdekjes së ngadaltë.

“Unë nuk kam forcë për ta kënaqur kërkesën e Leninit, andaj më duhet ta refuzojë këtë mision, pa marrë parasysh se sa human dhe i nevojshëm është”, ka shkruar Stalini. Por si vazhdon historia dhe përse ish-udhëheqësi i Jugosllavisë do ta vriste Stalinin? Dy pikat më të forta ku mbështetet slloveni janë së pari një hakmarrje për vrasjen e Leninit dhe e dyta; Stalini kishte urdhëruar një sërë atentatesh ndaj Titos, të cilat kishin dështuar. Letra që Tito i shkruajti Stalinit për atentatet dhe porosia e fundit e Leninit hedhin dritë mbi historinë ndërsa përbëjnë boshtin e studimit të historianit Pirjavec.

Lenini vdiq vitin e ardhshëm, si pasojë e sulmit në tru. Konkluzioni tek i cili kanë arritur mjekët është se Lenini me të vërtetë ka mundur të ketë sulm, si pasojë e helmimit me cianid. Dyshohet se Stalini nuk ka ngurruar ndaj kërkesës e Leninit, sidomos pasi ai, në rast të vdekjes së tij, do ta merrte kontrollin e Bashkimit Sovjetik.

Këtë fakt, si pikënisje për tezën e tij, e përdori historiani slloven Joze Pirjavec, i cili kohët e fundit botoi biografinë e Titos, “Tovaris”, e cila ndjek 27 vitet e tij në pushtet. Biografia është bazuar në dokumentacion të gjerë, nga arkiva të shumta, shumë prej të cilave janë neglizhuar dhe injoruar më parë.

Në mesin e shumë zbulimeve të tij, Pirjavec jep sugjerimin se Tito, sipas të gjitha gjasave, ka urdhëruar vrasjen e Stalinit me helm, i cili helm ka shkaktuar më vonë sulmin e tij në tru. Ai thotë se Tito urdhëroi vrasësin për ta helmuar Stalinin, në të njëjtën mënyrë siç ka kërkuar Lenini. Ndërsa, shumica mendojnë se nëse Stalini e ka vrarë Leninin e Tito Stalinin, në këtë mënyrë ka vepruar drejtësia!:

Kur vdiq Stalini më 5 mars 1953 , në zyrën e tij është gjetur letra paralajmëruese e Titos.

Dihet paraprakisht se Stalini 22 herë u përpoq të vriste Titon, sepse ata nuk pajtoheshin që nga fundi i Luftës së Dytë Botërore. Por, të gjitha përpjekjet e këtyre atentateve kanë dështuar, përfshirë rastin kur Stalini ia ka dërguar një kuti për bizhuteri, e cila kur hapej lëshonte gaz nervor.

Në letrën e tij Tito ka paralajmëruar Stalinin se ai (Stalini) mund të dërgojë sa të dojë vrasës, por se atij (Titos) i mjafton vetëm një…

Historia fillon në 28 shkurt 1953, atëherë kur Stalini i lodhur lëshon kabinetin dhe tërhiqet në shtëpinë e tij që ndodhej në periferi të Moskës. Ai zhvilloi një takim me bashkëpunëtorët e tij më të afërt, përfshirë edhe kreun e policisë sekrete si dhe Nikita Hrushovin – shefin e atëhershëm të partisë për Moskën.

Sipas të dhënave historike, takimi zgjati deri në orën katër të mëngjesit dhe asnjë prej të pranishmëve nuk vërejti se Stalini ndjehej keq. Stalini pastaj sigurimit ia dha “lirinë”, duke i urdhëruar që të mos e zgjojnë nga gjumi.

Stalini zakonisht është zgjuar në ora 06:30 të mëngjesit. Atëherë ka ftuar sigurimin që t’ia sjellin një çaj. Por, kjo nuk ndodhi kështu. Derisa truprojat ishin të shqetësuar, nuk kanë harruar se janë urdhëruar që të mos e zgjojnë. Në atë kohë, shpërfillja e urdhrave ndëshkohej, madje edhe me ekzekutime.

Ata gjetën Stalinin të shtrirë në dysheme, të palëvizshëm, pa fuqinë për të folur. Ai ishte ende gjallë. Ora e tij e thyer ishte ndalur në 6:30, gjë që tregon se në atë kohë kishte pësuar sulmin.

Sigurimi edhe atëherë nuk guxonte që të ftonte mjekun, nga frika se tejkalojnë kompetencat që kanë. Pas reflektimit të gjatë, ata e telefonuan ministrin e sigurimit të shtetit, i cili e ftoi shefin e policisë sekrete. Tek atëherë ka arritur mjeku (shumë historianë sot besojnë se ata qëllimisht e vonuan ardhjen e tij).

Kur mjeku erdhi, Stalini ishte i paralizuar pjesërisht, ndërsa villte gjak. Çdo gjë tregonte se ai ka përjetuar një sulm të rënd në tru. Stalini jetoi në agoni për disa ditë, për të vdekur më 5 mars, si rezultat i problemeve me frymëmarrje.

Pendesa e Hrushovit

Në vitin 1955, kur Hrushovi vizitoi Beogradin, ai i ka kërkuar falje Titos për të gjitha atentatet, ndërsa i dha mirënjohje për gjithçka që ka mbijetuar.

“Vërtet, jeni ruajtur mirë. Keni njerëz të mirë rreth vetes, spiunë të mirë të cilët e dinin çdo qëllim të Stalinit”, ka thënë Nikita Hrushov.

“Stalini e dinte gjithmonë se sa mirë më ruajnë. Pas paralajmërimeve se ka dërguar shumë vrasës, është e qartë se edhe ai ka pas pak frikë”, ia kthen Tito.

Joze Pirjavec

Stalini ishte i shqetësuar seriozisht në lidhje me kërcënimin e Titos, ndonëse mendimi i pranuar botërisht, që mbizotëron edhe sot, është se Stalini kishte edhe më herët sulme të tilla në tru dhe se sulmi i fundit nuk ishte befasues për askënd.

 

Nga Ardit Rada

PËRGJIGJU

Ju lutemi shkruani komentin tuaj
Ju lutem vendosni emrin tuaj ketu